فى اول صلاح سالم حتلاقى واحد بيوزع ورق على العربيات, كنت متوقع اعلان عن شركه للرش و القضاء على الصراصير او نشترى موبايلك و نبدلهولك او حتى بشرى للاهالى الكرام على افتتاح دراى كلين ... كله كان متوقع الا انى الاقى اعلان عن مرشح لرأسه الجمهوريه!! انا بصراحه كلمت الرقم الموجود على الاعلان وانا مش مصدق ان الراجل ده بيتكلم جد ... محدش رد فقلت تلاقى الولد اللى ماسك تليفون الحمله طلع هنا ولا هناك ... شويه ولقيت الرقم بتاع الحمله بيتصل بيا
ايوه ... الرقم ده اتصل بيا ... مظبوط اصلى لقيت اعلان عن رئيس جمهوريه و حبيت استفسر يعنى ... ايوه انا مع حضرتك ... (بصراحه انا اتفاجئت بانى بكلم الراجل شخصيا!! ايه ده؟ ده حتى مش جايب حد يشتغل فى الموضوع)
تكلمت مع الرئيس المحتمل حوالى عشر دقائق ... اكد لى فيهم انه راجل بتاع ربنا (اتربى فى السعوديه) و بتاع ليبراليا و علمانيا و اعجبك (عاش ٧ سنين فى امريكا و منسيش يقولى انه مش معاه الجنسيه) و راجل فاهم اقتصاد كويس (عنده شركات و شبعان) و بيعرف يكلم الشباب علشان تم ٤٢ سنه امبارح .. سألته طب ليه رئيس جمهوريه؟ ماله يعنى مجلس الشعب ولا مجلس محلى ؟ حاجه كده يمشى فيها فى الاول يعنى! قاللى انه بص على المرشحين الحاليين و لقى انهم مينفعوش (بصراحه انا كنت موافقه فى دى)
عموما ختم معايا المكالمه بانه قالى انه حيطلع فى التليفزيون يوم الخميس الساعه ٦ على قناه الحافظ و ممكن اتابعه عليها و قفلت المكالمه
انا لسه مش فاهم هو كان بيتكلم جد ولا راجل عايز يشتهر علشان ممكن يمشى البيزنس بتاعه .. فعلا مش فاهم
